Талачынскія рыбаловы і паляўнічыя сталі пераможцамі міжраённых спаборніцтваў
У мінулую суботу ціхія мясціны аднаго з вадаёмаў Аршанскага раёна ажывілі чалавечыя галасы. У маляўнічым яго куточку каля вёскі Міцькаўшчына ладзіліся міжраённыя спаборніцтвы па рыбнай лоўлі і паляўніча-стралковым шматбор’і. Удзел у барацьбе сярод сапраўдных мужчын, аматараў прыроды і умела валодаючых вудай і стрэльбай, бралі каманды Аршанскага, Дубровенскага і Талачынскага раёнаў.
Нягледзячы на тое, што Талачынскі раён абдзелены на водныя багацці, нашая каманда ў складзе 11 чалавек выступала ў прыўзнятым настроі і паказала лепшы вынік сярод іншых. Усе без выключэння дзейнічалі граматна, засяроджваючы ўвагу на кожным руху і дзеянні, не адступаючыся ад шматлікіх сакрэтаў паспяховай рыбалкі.
Літаральна віртуозна валодалі вудай Аляксей Якіменка (у асабістым заліку ў яго другое месца), Сяргей Шастак, Канстанцін Любецкі, Уладзіслаў Шышко, Сяргей Гамбалеўскі, Юрый Алаеў, Анатоль Мальцаў, Юрый Кашунін, Уладзімір Лісоўскі і Уладзімір Калінін.
Вынік адпаведны — першае каманднае месца. І не таму, што галоўным суддзёй даных спаборніцтваў выступаў дырэктар Талачынскай РАС РДГА “БТПР” Пётр Салаўёў. Пётр Аркадзьевіч ведае пра рыбалку ўсё і ў тэорыі, і на практыцы, таму ад аб’ектыўных ацэнак у галоўнага суддзі, як і ў яго памочнікаў, адступленняў быць не магло.
Пашанцавала талачынцам і ў паляўнічай справе. На рахунку меткіх Міхаіла Быхаўца, Валерыя Качана і Аляксея Матлаха, зноў жа, першае месца. Пераможцы адзначаны граматамі і каштоўнымі падарункамі.
Моцную падтрымку нашым удзельнікам спаборніцтваў аказалі прыехаўшыя пабалець за сваіх сябры і калегі па захапленні рыбалкай і паляваннем.
— У нас усё атрымалася, — зазначыў, падводзячы вынікі, П. А. Салаўёў, — найлепшым чынам. Усім удалося раскрыць свае здольнасці, паказаць на справе, чаго вартыя. Талачынцаў адрознівала ад іншых сабранасць, арганізаванасць, вера ў сябе і сваіх таварышаў.
23 ліпеня па гэтых відах спаборніцтваў нас чакаюць ужо новыя выпрабаванні. У гэты дзень у Полацкім раёне пройдзе другі, абласны, этап вызначэння лепшых з лепшых для адбору ў каманду Віцебшчыны на ўдзел яе ў рэспубліканскіх спаборніцтвах.
Віктар МІКАЛАЕЎ.
