Атрымалі першы дзяржаўны дакумент ва ўрачыстых абставінах
У мінулую суботу ў кінатэатры “Колас” адбылася ўрачыстая рэгістрацыя нараджэння Паўла Міронава, Міланы Удоўскай і Максіма Амбросава. Бацькі атрымалі першыя дзяржаўныя дакументы сваіх немаўлятак.
Цёплыя, пранікнёныя пажаданні сем’ям выказала супрацоўніца ЗАГСа Ірына Парэпка, якая выразіла надзею, што яшчэ не раз ім давядзецца сустрэцца з такой радаснай нагоды, як нараджэнне дзіцяці. Без дзяцей немагчыма адчуць усю паўнату чалавечага шчасця.
Прыход у свет новага чалавечка такая ж важная падзея для сям’і, як і шлюб. Таму ЗАГС і прапаноўвае бацькам важную падзею ў іх жыцці адзначаць не ў звычайных абставінах, а ўрачыста. Па жаданні бацькоў цырымонія праводзіцца на рускай ці беларускай мове. У канцы яе бацькі прымацоўваюць на “дрэве жыцця” кветкі з імёнамі сваіх дзяцей. Першыя кветкі з імёнамі Павел, Мілана і Максім ужо расцвілі і чакаюць папаўнення.
Госці сямейнага свята ў кнізе ўрачыстых рэгістрацый пакінулі свае цёплыя, шчырыя словы для нованароджаных і іх бацькоў.
Жадаем прыгожага і яскравага сямейнага свята!
Марыя ХМЯЛЮК.