Талачынцы пабывалі ў гасцях у элітным спецпадраздзяленні (+фота)
2 жніўня, у Дзень дэсантнікаў і сіл спецыяльных аперацый, прадстаўнікі раённай структуры Беларускага саюза афіцэраў, раённага ваенкамата, раённай арганізацыі ветэранаў, а таксама маладога пакалення — дзеці і падлеткі — наведалі пятую асобную брыгаду спецыяльнага прызначэння ў Мар’інай Горцы (Мінская вобласць). У гэты дзень там прайшлі святочныя ўрачыстасці і паказальныя выступленні байцоў.
На тэрыторыі воінскай часці было людна. Завіталі сюды бацькі, дзядулі і бабулі, сябры тых, хто ў цяперашні час праходзіць службу ў гэтым элітным падраздзяленні, былыя (калі можна ўжыць такую фармуліроўку, бо, кажуць, былых не бывае) салдаты і афіцэры розных пакаленняў. Панавала прыязная, цёплая атмасфера, хтосьці па-сяброўску расчулена абдымаўся з саслужыўцам, з якім не бачыўся некалькі гадоў, хтосьці, з ліку адслужыўшых нядаўна тэрміновую службу, вітаўся і жартаваў са сваім камандзірам, хтосьці падымаў над натоўпам маленькага сына ці дачку, каб паказаць выступленні ваенных.
Усе жадаючыя мелі магчымасць азнаёміцца з узорамі разнастайнага абсталявання, тэхнікі і амуніцыі (транспартныя сродкі, сродкі сувязі, акваланг, шлем, бронекамізэлька і інш.), патрымаць зброю, зрабіць цікавыя фотаздымкі.
Таксама талачынская дэлегацыя ўсклала вянок да мемарыяла ў гонар байцоў, загінуўшых у ходзе баявых дзеянняў за межамі краіны.
Падобнае мерапрыемства, несумненна, мае вялікае значэнне ў патрыятычным выхаванні. У натоўпе не раз можна было пачуць, як дзеці і падлеткі выказвалі захапленне і паведамлялі сваім бацькам, што хочуць служыць у гэтым падраздзяленні, пыталіся, што неабходна рабіць, каб трапіць сюды.
Талачынская структура Беларускага саюза афіцэраў выказвае вялікую падзяку кіраўніку прадпрыемства ДБУ-63 Яшчуку М. Р. за дапамогу ў арганізацыі гэтай паездкі.
Сяргей АБРАМОВІЧ.
«А хто там iдзе, а хто там iдзе
У агромнiстай такой грамадзе?
— Афіцэры».
(Амаль па Янку Купалу).