Сярод талачынскіх тысячнікаў — адзін першы ў вобласці
Паспяхова ідзе ўборка збожжавых на палях кансервавага завода. На гэтым тыдні пяць механізатараў прадпрыемства дасягнулі тысячнага рубяжу ў намалоце: Аляксандр Нарчук, Аляксандр Ільін, Мікалай Ракаў, Сяргей Мазок, Уладзімір Яршоў. Дарэчы, Уладзімір стаў яшчэ і першым у Віцебскай вобласці тысячнікам сярод маладых камбайнераў.
Павіншаваць перадавікоў прыехалі ў чацвер на поле прадстаўнікі некалькіх устаноў і ведамстваў: дырэктар завода Анюхоўскі А. В., начальнік галоўнага ўпраўлення ідэалагічнай работы, культуры і па справах моладзі аблвыканкама Ягораў Г. М., старшыня райвыканкама Ягораў С. В., старшыня раённага Савета дэпутатаў Мурашка Г. Г., кіраўнікі раённых структур ФПБ і прафсаюза работнікаў АПК, абласнога камітэта БРСМ, дарослыя і юныя самадзейныя артысты, некаторыя іншыя службовыя асобы раённага і абласнога ўзроўняў.
Падобныя сустрэчы заўсёды асабліва прыязныя і кранальныя, таму што губляць час няма як, працаў-нікоў чакае поле, і ў выніку ўсе станоўчыя эмоцыі, якімі можна было б дзяліцца доўга і няспешна, выліваюцца ў канцэнтраваным выглядзе. Цёпла, а месцамі і з гумарам расказаў прысутным пра сваіх лепшых работнікаў кіраўнік прадпрыемства — раскрыў адметныя рысы іх характараў, прыгадаў і параўнаў ранейшыя дасягненні, пажадаў новых поспехаў. Пра значэнне працы хлебароба і ў прыватнасці пра дасягненні герояў урачыстасці ў кантэксце сёлетняй уборачнай кампаніі вёў гаворку старшыня райвыканкама Ягораў С. В. З добрымі словамі, падзякамі і пажаданнямі звярнуліся ўсе іншыя госці.
І зноў загулі камбайны, пайшлі па полі, літаральна на вачах “распранаючы” яго, малюючы новы пейзаж і папаўняючы скарбонку працоўных дасягненняў хлебаробаў.
Сяргей АБРАМОВІЧ.
Хорошее фото,только реклама брсм лишняя,уже перебор.