У аддзеле па экалогіі, турызме, і краязнаўстве Цэнтра дзяцей і моладзі ў Талачыне педагогі і школьнікі аб’яднаныя адной мэтай
На базе раённага Цэнтра дзяцей і моладзі працуе аддзел па экалогіі, турызме, і краязнаўстве, які ўзначальвае Ганна Ігараўна Зяблава. Мэтай работы трох аб’яднанняў па інтарэсах у гэтым накірунку з’яўляецца выхаванне ў школьнікаў беражлівых адносін да прыроды, цікавасці да гісторыі роднага краю, прывіццё турыстычных навыкаў.
Памятным для дзяцей і педагогаў мінулым летам стаў аднадзённы паход па гістарычных мясцінах горада і яго ваколіц. У гэты дзень яны прайшлі дванаццаць кіламетраў, наведалі памятныя мясціны — парк у Юзэфполлі, Курган Славы, помнікі ахвярам фашызму і воінам-інтэрнацыяналістам, магілу невядомых танкістаў у Райцах, месца расстрэлу дзвюх тысяч яўрэяў. Педагогі расказалі пра гісторыю ўзнікнення помнікаў, ушанавалі памяць загінуўшых хвілінай маўчання, усклалі кветкі.
Не абышлося ў паходзе без прывалу. Пад кіраўніцтвам педагогаў школьнікі вучыліся ставіць палатку, раскладваць вогнішча і гатаваць на ім ежу. Нягледзячы на стомленасць, уражаныя ўбачаным і пачутым, яны выразілі жаданне наведаць іншыя цікавыя месцы свайго раёна.
Кіраўнік аб’яднання па інтарэсах па краязнаўстве і экскурса-знаўстве Сяргей Уладзіміравіч Пятрушын закончыў Мінскі індустрыяльна-педагагічны каледж па спецыяльнасці турызм і гасціннасць. Працаваць у раённым Цэнтры дзяцей і моладзі пачаў у гэтым навучальным годзе. Малады педагог ставіць за мэту зацікавіць вучняў гісторыяй нашага раёна, падрыхтаваць экскурсаводаў па знакамітых мясцінах. У бліжэйшы час педагогі плануюць паход у Друцк на стражытнае гарадзішча.
Педагогам дадатковай адукацыі ў турыстычным накірунку працуе Казакевіч Яўген Ігаравіч. Ён з’яўляецца спецыялістам па прамысловым альпінізме. Пад яго кіраўніцтвам праводзяцца майстар-класы па турызме. Вучні авалодваюць майстэрствам горна-пешаходнага турызму, вучацца працаваць з карабінамі, абвязкамі, вяроўкамі. Вялікую ўвагу ён удзяляе захоўванню правіл бяспекі дзяцей пры правядзенні практычных заняткаў.
У планах работы аддзела па экалогіі, турызме і краязнаўстве — умацаванне матэрыяльна-тэхнічнай базы, стварэнне краязнаўчага кутка ў Цэнтры дзяцей і моладзі. Тым больш, што ёсць пачатак — сюды перададзеныя экспанаты з музея Навінкаўскай базавай школы, знойдзеныя падчас раскопак вучнямі пад кіраўніцтвам дырэктара школы Канстанціна Іванавіча Рамановіча. Гэты дарагі падарунак як напамін не толькі пра нашае мінулае, але і пра цудоўнага чалавека, вялікага педагога, які аб’ядноўваў вакол сябе дзяцей, прывіваў любоў да роднага краю.
Алена СЕРАДА.
НА ЗДЫМКУ: С. У. Пятрушын і Г. І. Зяблава з дзецьмі.