У Талачыне з творамі беларускага першадрукара можа пазнаёміцца кожны
Напэўна, няма ў Беларусі чалавека, якому невядома было б імя Францыска Скарыны. Таленавіты чалавек у многіх сферах дзейнасці, у сусветную гісторыю ён увайшоў перш за ўсё як беларускі першадрукар і асветнік. Толькі вось пазнаёміцца з яго творамі да пэўнага часу мог не кожны.
Цяпер жа гэта стала магчыма дзякуючы кнізе “Сусветная спадчына Францыска Скарыны”, якая нядаўна паступіла ў раённую бібліятэку. Выдадзена яна Беларускай энцыклапедыяй імя П.Броўкі і атрымала Гран-пры XIV Міжнароднага конкурсу “Мастацтва кнігі” краін — удзельнікаў СНД і Гран-пры конкурсу II Міжнароднай кніжнай выставы-кірмаша Eurasion Book Fair 2017 у Астане.
У гэтай кнізе ўпершыню прадстаўлены ўсе 25 кніг Францыска Скарыны. Спадчына беларускага першадрукара сёння з’яўляецца нацыянальным здабыткам і захоўваецца ў кніжных і музейных зборах многіх краін свету — Беларусі, Расіі, Украіны, Германіі, Даніі, Польшчы, Літвы, Вялікабрытаніі, Славеніі, Чэхіі, ЗША. Выданне багата ілюстравана і распавядае пра кожную кнігу Ф. Скарыны.
На выставе чытачы таксама могуць пазнаёміцца з кнігамі “Францыск Скарына на мовах народаў свету”, “Франциск Скорина. Жизнь и деятельность белорусского просветителя”, “Франциск Скорина — человек мира”.
Ирына ТРУХАНЁНАК,
бібліёграф Талачынскай ЦБС.