На “Белтрубпласце” асвойваюць новую прадукцыю і шукаюць шляхі эканамічнага росту
На Коханаўскім трубным заводзе “Белтрубпласт” у канцы верасня ўстаноўлена новая лінія па вытворчасці поліэтыленавых водаправодных труб дыяметрам да 1000 міліметраў. Гэта перспектыўны напрамак вытворчасці, таму што сёння, паводле слоў дырэктара прадпрыемства Чуркіна А. В., трубы такога дыяметра ніхто ў Беларусі не выпускае.
— У рэспубліцы ёсць аб’екты, якія маюць патрэбу ў такой прадукцыі, і мы спадзяёмся, што вытворчасць гэтай прадукцыі на працягу бліжэйшых гадоў стане для нас адною з крыніц стабільнага заробку, — дзеліцца кіраўнік прадпрыемства планамі і перспектывамі.
Асваенне новых рынкаў збыту — актуальная задача, бо сёння завод перажывае няпросты перыяд. З-за змяншэння попыту зніжаецца аб’ём вытворчасці поліэтыленавых труб, спад склаў 25%, даводзіцца скарачаць людзей (на сённяшні дзень у калектыве 230 чалавек, у той час як яшчэ ў пачатку года было 250). Вытворчасць металічных фітынгаў павялічылася на 11%, і гэта дазваляе захоўваць стабільнасць прадпрыемства.
— Адсутнасць росту — гэта нязвыклая для нас сітуацыя, — адзначае Аляксандр Васільевіч. — Але мы не губляем упэўненасці ў сваіх сілах і не спыняем пошукі новых рашэнняў, накіраваных на аднаўленне страчаных пазіцый і забеспячэнне эканамічнага росту.
Дарэчы, нягледзячы на зніжэнне паказчыкаў аб’ёмаў вытворчасці труб, зарплата не змяншаецца, а за кошт скарачэння штату нават расце: з пачатку года ў сярэднім па прадпрыемстве яна склала 704 рублі, што на 11% больш, чым у 2016-м, а ў жніўні рост падымаўся да 19% (у параўнанні са жніўнем мінулага года), пры гэтым сярэдняя зарплата складала 834 рублі.
За 8 месяцаў бягучага года на 41% вырас экспарт. Прадукцыя адгружаецца ў Аўстрыю, Кітай, Украіну. Згорнута вытворчасць ротафармаваных вырабаў, на змену гэтай тэхналогіі (цвёрды поліэтылен засыпаецца ў форму, якая пасля награецца і круціцца ў плавільнай камеры) прыйшло ліццё: да трох ліццёвых машын, якія ўжо былі на прадпрыемстве, сёлета дадалася яшчэ адна.
Прадпрыемства крочыць у нагу з тэхнічным прагрэсам і, канечне ж, з рынкам — жыва рэагуючы на яго патрабаванні, аператыўна перастройваючыся, змяняючы падыходы да справы ў адпаведнасці з тым, як змяняюцца патрабаванні спажыўцоў прадукцыі.
Сяргей АБРАМОВІЧ.
Уровень зарплаты должен быть такой, что бы перекрыть БАЗОВЫЕ потребности гражданина.