У Талачыне прайшла сустрэча, прымеркаваная да 100-годдзя Міхаіла Савіцкага
Сёння нашаму славутаму земляку, ураджэнцу вёскі Звянячы, мастаку Міхаілу Савіцкаму споўнілася б 100 гадоў. З гэтай нагоды ў Талачынскім гісторыка-краязнаўчым музеі адбылася сустрэча, прысвечаная памяці творцы. Удзельнікамі яе сталі прадстаўнікі райвыканкама, прафсаюзных структур і грамадскіх арганізацый, устаноў адукацыі і культуры, прадпрыемстваў.
Адкрываючы сустрэчу, начальнік аддзела ідэалагічнай работы, культуры і па справах моладзі райвыканкама Алена Валевіч нагадала, што вялікі ўклад Міхаіла Савіцкага ў мастацтва адзначаны высокімі ганаровымі званнямі і ўзнагародамі, і выказала ўпэўненасць, што цікавыя факты яго біяграфіі нікога з прысутных не пакінуць абыякавымі, тым больш цяпер, у Год гістарычнай памяці.
Дырэктар музея Ірына Пікулік, якой у свой час некалькі разоў выпала сустрэцца з Міхаілам Савіцкім, вельмі жыва і выразна расказала прысутным пра найбольш яскравыя і трагічныя падзеі з жыцця мастака (перажыў і данёс да нас праз свае палотны жахі вайны і фашысцкіх канцлагераў), пра адлюстраванне гэтых падзей у яго творчасці.
Завяршылася мерапрыемства дэманстрацыяй відэасюжэтаў, якія ўводзяць гледача ў свет творчасці Міхаіла Савіцкага.
Некаторыя іншыя падрабязнасці сустрэчы — у адным з бліжэйшых нумароў газеты.
Сяргей АБРАМОВІЧ.