Сёння — Сусветны дзень тэатра. Віншуем талачынскіх артыстаў!
Сёння — Сусветны дзень тэатра. Тэатральнае мастацтва выконвае і забаўляльную, і выхаваўчую функцыі. На сайце Міжнароднага інстытута тэатра паведамляецца, што адною з мэт стваральнікаў гэтай арганізацыі, заснаванай у 1948 годзе, з’яўляецца прыцягненне выканальніцкіх мастацтваў да справы міру і ўзаемапаразумення.
У 1920 годзе ў Талачыне пры хаце-чытальні створаны аматарскі тэатр, які пазней парацягваў дзейнасць пры раённым Доме культуры, а сёння з’яўляецца калектывам раённага Цэнтра культуры і народнай творчасці — такім чынам, яго біяграфія налічвае ўжо 104 гады. За гэты час калектывам пастаўлены дзясяткі спектакляў на беларускай і рускай мовах. Значнае месца ў рэпертуары займаюць творы на тэму Вялікай Айчыннай вайны, ёсць і камедыі, і пастаноўкі, якія прымушаюць задумацца над філасофскімі пытаннямі.
У 1971 годзе тэатр атрымаў званне народнага і з таго часу зноў і зноў яго пацвярджае.
З 1979 года рэжысёрам калектыву з’яўляецца Святлана Васільева. Пра дваіх удзельнікаў трупы (Уладзіміра Чаплянка і Аляксандра Чурылава) мы распавядалі, з іншымі яшчэ пазнаёмім сваіх чытачоў.
У цяперашні час калектыў рыхтуецца да прэм’еры — «Ты помнишь, Алёша…» паводле Аляксея Дударава.
Віншуем калектыў са святам, жадаем новых творчых здабыткаў і шмат удзячных гледачоў.
НА ЗДЫМКУ: рэжысёр і артысты талачынскага тэатра ў дзень прэм’еры спектакля «Сказ про Федота-стрельца, удалого молодца» паводле Леаніда Філатава, 2022 год.