На трасе М1 — новы аб’ект
Два тыдні таму на трасе М1 каля вёскі Малое Высокае прыняло першых кліентаў прыдарожнае кафэ з вясёлаю назваю “Ёлкі-палкі”. Пакуль што ў меню толькі шашлык і напоі, але ў перспектыве, пасля таго, як будзе даведзена да ладу кухня (шашлыкі гатуюцца на дварэ), асартымент пашырыцца.
Больш за тое, як паведамілі ўладальнікі кафэ Андрэй Зезюлевіч і Вадзім Грудзіна, адным толькі пунктам харчавання гэты аб’ект прыдарожнага сэрвісу не абмяжуецца. У планах — будаўніцтва лазні і шынамантажнай майстэрні, адпаведныя работы ўжо вядуцца.
— Ну а пакуль мы ўсім гэтым займаемся, трэба выкарыстоўваць магчымасць атрымання хоць якой выручкі, так што, абуладкаваўшы памяшканне і добраўпарадкаваўшы тэрыторыю, адчыніліся, няхай хоць колькі кліентаў заедзе перакусіць.
Нягледзячы на тое, што на аб’екце будзе праводзіцца яшчэ нямала будаўнічых работ, з дарогі і з боку стаянкі ён выглядае поўнасцю добраўпарадкаваным. Даведзены да ладу і інтэр’ер, у памяшканні поўны парадак, абжыта і ўтульна, пахі будаўніча-аддзелачных матэрыялаў саступілі месца кулінарным. Відаць, што перш чым запрашаць кліентаў, гаспадары зрабілі ўсё, каб яны не адчувалі сябе ў палявых умовах.
Будаўніцтва кафэ, па словах Андрэя Зезюлевіча, пачалося год таму, прыкладна ў такі самы час, у маі, закладвалі падмурак. Наперадзе яшчэ вялікая праца, але пачатак зроблены ўдала, усё астатняе — гэта ўжо развіццё і ўдасканаленне.
Сяргей АБРАМОВІЧ.